Posted by gbroos

Die Redaksie vir ons webwerf wens u ‘n geseënde en vreugdevolle 2019 toe. Na aanleiding daarvan gee ons vir u die onderstaande gedig van Driekie Grobler. U word ook uitgenooi om in te loer of in te luister na ons eredienste op 30 Desember.

NUWEJAAR

Heer, as die laaste uur van die jaar my verlaat

is dit van U wat ek liefde en genade vra

en soms is ek in die lewe verras en verslae

maar met tye deur vriende en geliefdes agtergelaat.

en as die laaste minuut van die jaar verdwyn

wil ek na tye terugdink waar ek oomblikke van geluk kon vind

en as die lewe my neer wil druk staan ek voor U soos ‘n kind,

vertrou ek in hoop op die nuwe more se sonskyn.

Gee my ‘n gesindheid wat vergewe en vergeet,

help my om aan U, my vrou, my land getrou te bly,

vry te staan van selfverheffing en enige huigelary

en om werklik van die diepte van liefde te weet.

Help my om te lewe vir veel meer as eie gewin,

die stryd te stry vir dit wat reg is

en bring U my op my weg daagliks nuwe betekenis:

leer my om gedurig U waarhede te ontgin,

te leef net na U wil in my menslikheid

en ek smeek dat U die pad vooruit loop,

om elke dag te vervul met nuwe hoop

en vir my te word deel van my werklikheid

en as die donker dae skielik wil kom,

wees U die lig wat lei en die pad verlig

en as ek afwyk, bring U my dan tot ewewig,

tot in die laaste dae van ouderdom.

*****