Hou vas in die geloof sonder om te verslap – 30 November 2025 – 17:30

Wanneer ’n mens Hebreërs 6 lees, voel dit amper soos ’n skrikstem in die donker. Die woorde is swaar, en dit klink vir ’n oomblik asof ’n gelowige regtig uit die hand van God kan glip. Maar wanneer ons die Here se stem reg hoor, ontdek ons dat hierdie gedeelte nie bedoel is om ons van God af weg te skrik nie, maar juis om ons vaster aan Hom te bind.

Die eerste lesers van hierdie brief was moeg. Hulle het swaargekry, hulle was vervolg, hulle het begin wonder of dit alles die moeite werd is, en hulle geloof het begin verslap. En dan kom die Here en waarsku hulle met erns: Moenie terugval nie. Moenie laat jou hart stadig wegdryf nie. Moenie dink dat jy kan speel met geloof sonder om Christus te omhels nie.

Maar saam met die waarskuwing kom ’n wonderlike troos. Die Here sê nie dat sy kinders wél geval het nie—Hy waarsku sodat hulle nie val nie. Die Here herinner hulle aan wat Hy reeds in hulle begin het, en Hy bemoedig hulle: “Ons is oor julle oortuig van beter dinge – dinge wat by die verlossing pas” (6:9).

Die skrikwoorde is dus nie geskryf om ware gelowiges in wanhoop te dompel nie, maar om hulle wakker te maak tot die veilige werklikheid: God laat sy kinders nie los nie. ’n Ware gelowige kan nie die sonde teen die Heilige Gees pleeg nie, want die Gees self bewaar hom. Ons volharding rus nie op ons eie vasbyt nie, maar op God se genadehande wat ons dra. En daarom leef ons nie sorgeloos nie, maar dankbaar. Ons hou vas aan Christus—want Hy hou vas aan ons. Niks kan ons uit sy hand ruk nie.