Prediker: Ds. JL Lee | Kerk: GK Waterkloofrand | Datum: 12 Julie 2026 om 17:30 | ▶ Kyk op YouTube
Ons almal ken verskonings. “Ek het nie tyd nie.” “Ek is te besig.” “Ek sal later.” Sulke woorde klink onskuldig, maar Jesus wys in Lukas 9 dat verskonings dikwels ons ware prioriteite blootlê.
Terwyl Jesus vasbeslote op pad is na Jerusalem en uiteindelik na die kruis, ontmoet Hy drie mense wat almal bereid lyk om Hom te volg. Tog het elkeen ‘n rede waarom hulle nie dadelik kan gehoorsaam nie. Die een besef nie die koste van dissipelskap nie. Die tweede wil eers ander verpligtinge afhandel. Die derde wil eers sy sake by die huis in orde kry. Jesus wys egter dat die Koninkryk van God nie tweede plek kan inneem nie.
Die bekende beeld van die ploeg som dit treffend op: “Iemand wat hand aan die ploeg slaan en aanhou omkyk na wat agter is, is nie geskik vir die koninkryk van God nie.” ‘n Boer wat heeltyd terugkyk, ploeg skeef. Net so kan ‘n Christen nie met ‘n verdeelde hart vir Christus volg nie.a
Die diepste rede waarom Jesus hierdie eis stel, is omdat Hy self nooit verskonings gemaak het nie. Hy het nie teruggedraai toe die kruis Hom gewag het nie. Hy het Homself verneder, ons sonde gedra en die volle prys betaal sodat ons aan God se Koninkryk kan behoort. Daarom roep Hy ons nou om Hom met onverdeelde toewyding te volg.
Dalk is die grootste verskoning wat ons vandag gebruik: “Ek het nie tyd nie.” Maar tyd volg prioriteit. Dit waarvoor ons die meeste omgee, daarvoor maak ons tyd.
Vra jouself vandag eerlik af: Watter verskoning keer my om Christus met my hele hart te volg? Die Here roep ons nie tot ‘n lewe van verskonings nie, maar tot gehoorsaamheid. In sy Koninkryk gee Hy alles wat ons nodig het om getrou te volhard.