Ontvang die teken van die verbond as die sekerheid van God se beloftes. – 19 Oktober 2025 – 9:00

Die verbond van die Here is sekerlik een van die belangrikste temas wat in die Bybel te vinde is. Regdeur die verlossingsgeskiedenis van die mens staan die verbond as die basis van die Here se werking met ons. Daarsonder sal ons geloofslewe ernstig verarm, selfs vermink wees. Ons sekerheid en vertroue in die werk van die Here sal kwyn. Die verbond is inderdaad so belangrik vir die Kerk van Christus dat die manier waarop ons as gereformeerdes die woord bestudeer bekend staan as verbondsteologie.

In vanoggend se Skrifgedeelte hoor ons van die Here wat sy verbond met Abraham en sy nageslag wil bevestig. Hy het vroeër reeds homself aan Abraham verbind in Gen. 15. Wat hier egter vir ons uitstaan is die teken van die verbond. Al die mans wat in Abraham se huisgesin was moes aan hulle voorhuide besny word sodat hulle aan hulle liggame die teken kan dra van die Here wat Homself aan hulle verbind het.

In die Nuwe verbond wat deur die Bloed van Christus ingelei is het ons ʼn ander teken ontvang. Die heilige doop. Dit is net soos die besnydenis bedoel om ʼn teken aan ons liggaam te wees wat ons onderskei van alle ander mense en vir ons ʼn blywende herinnering is van ons kosbare verhouding met die Here.

Ons gaan die diepte en waarde van die verbondsteken van die Here ontgin deur na die Here se instelling van ʼn verbondsteken te kyk.

Prediker:                          Ds. AJ Wattel

Spesiale notas:                Alle berymings is vanuit die 1936-psalmboek.