Prediker: Ds. Hardus Lee | Kerk: GK Waterkloofrand | Datum: 4 Oktober 2026 om 17:30 | ▶ Kyk op YouTube
Martha ontmoet Jesus terwyl haar broer Lasarus reeds vier dae in die graf is. Haar woorde getuig van diepe smart, maar ook van geloof en ’n flikkering van hoop. Jesus gee haar nie bloot ’n verklaring vir sy vertraging nie. Hy vestig haar geloof op Homself: “Ek is die opstanding en die lewe.”
Die opwekking van Lasarus is ’n teken wat openbaar wie Christus is. Lasarus word tot sy gewone, sterflike lewe teruggeroep, maar Christus sou uit die dood opstaan tot ’n onverganklike lewe. Die teken versnel selfs Christus se pad na die kruis. Hy gee lewe deur self ons dood binne te gaan en die oordeel oor ons sonde te dra.
Volgens Sondag 17 het Christus se opstanding drie vrugte. Eerstens laat Hy ons deel in die geregtigheid wat Hy deur sy dood verwerf het. Tweedens wek Hy ons deur sy krag nou reeds tot ’n nuwe lewe van geloof en gehoorsaamheid. Derdens is sy opstanding die waarborg dat ons liggame eenmaal heerlik sal opstaan.
Die dood bly ’n werklike en pynlike vyand, maar dit is ’n verslane vyand. Ons lewe is veilig in die opgestane Christus. Daarom vra Hy ook persoonlik vir ons: “Glo jy dit?”