Die gemeente wat deur God uitgeroep word, roep Hom op elke plek aan. Die kerk is lig en sout in ‘n krom en verdraaide wêreld, en kan altyd verseker weet dat Hy wat roep, vaardig en bekwaam maak.
Die klem word egter nou geplaas op die oorvloedige genade waarmee die Koning van die kerk haar beklee. Genade is iets wat nie verdien kan word nie, dit beteken
letterlik ‘gratis geskenk’. Omdat ons nie ons verlossing kan verdien nie, en dit uit genade aan ons geskenk word, is dit iets waarvoor ons God onophoudelik voor kan (en moet!) dank.
God maak sy kerk ook ryk in genadegawes. In alle opsigte is die kerk bekwaam gemaak – selfs tot die mate dat sy nie daarin agterstaan nie. Dit wat nuttig en nodig is vir die bruidskerk om haar taak uit te voer – is aan haar gegee.
En sy moet so leef en dit tot God se eer gebruik dat dit in die handel en wandel van die gemeente sigbaar word.