Prediker: Ds. JL Lee | Kerk: GK Waterkloofrand | Datum: 2 Augustus 2026 om 09:00 | ▶ Kyk op YouTube
Jeremia se bediening herinner ons daaraan dat God se waarheid nooit afhanklik is van mense se goedkeuring nie. Al probeer mense die waarheid onderdruk deur dreigemente, vervolging of spot, bly God se Woord staan. Jeremia moes ‘n baie moeilike boodskap bring: Juda se sonde sou tot God se oordeel lei. Hulle het afgode gedien, die Here verlaat en gemeen dat sy teenwoordigheid in die tempel hulle outomaties veilig sou hou. Maar God laat nie met Hom spot nie. Hy eis opregte gehoorsaamheid en volkome toewyding.
Toe Pashur vir Jeremia laat slaan en in die blok sit, het dit gelyk asof die waarheid stilgemaak is. Tog gebeur die teenoorgestelde. Nadat Jeremia vrygelaat is, spreek hy God se oordeel nóg duideliker uit. Pashur, wat die profeet wou intimideer, word self die simbool van God se komende oordeel. Dit wys dat geen mens die Here se plan kan verydel nie.
Hierdie gedeelte stel ook vir ons ‘n persoonlike vraag: Hoe reageer ons op God se waarheid? Dit is maklik om die waarheid te aanvaar wanneer dit ons bemoedig, maar moeiliker wanneer dit ons sonde uitwys of verandering van ons vra. Dikwels kies ons gemak, gewildheid of eie voordeel bo gehoorsaamheid. Tog roep die Here ons om nie pragmatiese Christene te wees wat die waarheid met woorde bely, maar met ons dade verloën nie.
Die grootste troos lê daarin dat Jeremia se lyding vooruitwys na Christus. Jesus is ook verwerp, bespot en vervolg, maar sy kruis was nie die oorwinning van die duisternis nie. Juis daar het God die sonde en Satan oorwin. Daarom hoef gelowiges nie bang te wees vir mense of vervolging nie. Die waarheid van God kan nie vernietig word nie. Hy roep ons om sy Woord met nederigheid, moed en gehoorsaamheid vas te hou, omdat sy waarheid uiteindelik altyd sal seëvier.
Vrae vir katkisante ter bespreking:
1. Waarom het die Here vir Jeremia die kleipot laat koop en by die Ben-Hinnomdal laat breek? Wat moes hierdie simboliese handeling vir Juda leer?
2. Waarom het Pashur Jeremia laat slaan en in die blok laat sit? Wat leer hierdie gebeurtenis oor hoe die wêreld dikwels op God se waarheid reageer?
3. Wat beteken Jeremia se nuwe naam vir Pashur, “Skrik-rondom” (of “Angs van alle kante”), en hoe het dit God se oordeel aangekondig?
4. Hoe wys Jeremia se lyding vooruit na die lyding van Jesus Christus? Watter verskil maak Christus se gehoorsaamheid vir gelowiges vandag?
5. Die preek sê: “Die waarheid staan nie terug vir paaiboelies nie.” Hoe kan ‘n Christen hierdie waarheid prakties uitleef by die skool, universiteit, werk of tussen vriende wanneer dit moeilik of ongewild raak?